L'Omu senza la donna

L' OMU SENZA LA DONNA di Pino Vizzini
L'omu avi la varba e si senti impurtanti
l'omu senza la donna nun iè nenti
iè comu na cosa inutili e vacanti
comu un rasteddu ca nun avi denti

La donna duna all'omu la mportanza
ci dà lu fruttu di la so simenza
ci duna gioia, ci duna pristanza
e l'arricchisci di la so prisenza

L'omu senza la donna è lampadina
ca manca la currenti e nun adduma
cumu lu sciumi quannu fa la china
sdirrupa vuschi e inchi li vadduna

L'omu senza la donna è un carritteri
ci manca lu cavaddu ppì 'mpaiari
picchissu l'omu cerca la muglieri
ppì lu carrettu putiri tirari

L'omu senza la donna è maidduni
iè na maidda ca nun 'mpasta pani
iè nu marruggiu senza lu zappuni
iè un campanariu senza li campani

L'omu senza la donna è un canniliri
manca lu miccu e nun si po' addumari
ora amicu ti lu voogliu diri
l'omu senza la donna nun sa stari.