CUNSIGGHI MITAFORICI

di Franco Gitto 

'Ntisi na vuci ca jttàva strigghi,
era, un rivinnituri di cummogghi
d'appressu avia, a muggheri e quattru figghi
senza dimùra... e caricu di 'mbrogghi.

'Ci dissi: amicu, 'nn'aviti darigghi ?
Putèmu fari barattu chi me agghi...
m'arrispunniu cu a testa intr'e negghi:
non haiu darigghi, ma sulu cummogghi.
Haiu a muggheri, e sti quattru figghi...
e preju a morti s'idda m'arricogghi.

Dissi iù: Amicu,... ti riàlu st'agghi ,
mettili tra la terra e li cummogghi,
quannu t'adduni ca mettunu li gigghi
pigghiati na zappudda e li cattugghi...
e quannu beddi sicchi hannu li fogghi
vai, cu 'tto muggheri e li to figghi,
li tiri ad unu ad unu e l'arricogghi.

Torna a to casa, e segui i me cunsigghi ,
è poi essirni certu ca non sbagghi...
anzi; da sulu ti nni miravigghi...
picchì si ami la terra e la travagghi
hai dignitati e fami no nni 'mpegni .