393.97.18.272 - 393.97.18.431
di Antonio Famularo
"Vàrtulu Afflittu, 'un ébbi paci né vivu né mortu"
'Na vota a Filicudi, 'nt'o Mari du' Tirrenu,
Dipinnénti d'un Baruni, esigenti senza frenu,
'n 'Omu bonu e 'ndustriusu faticava tuttu sulu:
'i ch'agghiòrna a quannu 'scura travagghiàva cum'un mulu.
U' Baruni 'u chiamava, Vàrtulu era sempri prontu,
Cuminzava da' matina finu all'ura du' tramontu:
C'era sempri qacchi cosa chi s'avìa ancora 'a fari,
'Un ci dava mancu u' tempu 'i putìri rispirari.
Quannu arrivava a casa si sintìa cumu 'nu strazzu,
Scatasciàva so' mugghiéri cu' 'du stancu povirazzu:
Puri Idda 'u cumannàva cu' 'i mani 'nt'a i cianchi,
Ci facìa divintari puru i capiddi 'ianchi.
"Dammi un pezzuddu 'i pani cha 'i fami sugnu mortu",
"Prima vammi a 'biviràri 'i virduri 'nt'a lu ortu!"
"T'accuntentu, Nicaredda, 'un ti vògghiu fari tortu,
Famm' un pocu ripusari, 'i stanchizza sugnu cottu."
Da la Canna 'i Filicudi spunta u' suli 'na matìna,
Mentri u' Mari sciacquarìa e si distenni supr'a rina;
Scunzulata 'a Mugghièri chianci 'a pena suspirànnu
Pirchì Vàrtulu, Criatùru, si ni 'ìu all'àutru Munnu.
So' Mugghièri, Mischinedda, ci vulìa tantu beni,
Avìa tantu disidèriu 'i ristari sempri 'nziemi
Chi p'avirlu sempri accantu 'un 'u fici vurricàri:
Senza fàrici u' tabbùtu Idda 'u fici cremàri.
Poi 'i Vàrtulu i resti 'i sarvàu 'nt'a 'na clessidra,
Misurànnusi u' tempu 'a vutava sutta e supra:
Prima supra u' tavulinu, poi vicinu a u' lettu,
Qiddi cìnniri priziusi 'un avìanu rigettu.
Idda si priàva tutta a vardàri qiddi cìnniri
Dintra u' vìtru da' clessidra anchianàri e poi scìnniri:
E fu accussì chi Vàrtulu afflittu
'Un èbbi paci nè vivu nè mortu.
Parole e Musica:
Antonio Famularo
Da: "I Canti dell'Aedo"
famularoantonio@yahoo.it
Tel. 338 1899790
