Eventi e Comunicazioni

'Cala si vo' vìnniri

C'era 'na vota 'na vecchia putìa

'nt 'a scinnùta da' Marina Curta,

ma quanti cosi ch'idda vinnìa

'nt'a 'i scaffali 'i supra e 'i sutta.

Avìa puru tanti clienti,

pagavi in cuntanti o puru a cridenza,

e sempri china era di genti,

dintra parìa chi c'era abbunnànza.

Ma 'un ti dàvanu nenti pi' nenti,

cuntàvanu puru 'i cinqu' liri,

fari 'a spisa era avvilenti,

si pòviru eri ti ni putivi 'iri.

'nta u' quadernu signavanu 'a spisa

ma 'a to' borsa parìa vacanti,

si tardu pagavi ti mannavànu a casa

cu' l'occhi russi e u' cori pisanti.

Si beni nu' stavi facìanu a cridenza,

ti dàvanu qiddu cha tu 'un vulìvi:

pasta cu' u' pidùcchiu fora scadenza,

pani addimuràtu  e quattru alìvi.

Puru u' furmàggiu era ammuffùtu

e u' piscistoccu era 'mucatu:

quannu 'u sirravi parìa 'i ligna,

chinu 'i càmula e 'i fulìnia.

'iornu pi' 'iornu cuntavanu i sordi

tutti a munzeddu supra u' vancu,

mentri u' munnu affunna 'nt'e 'mbrogghi

s'ingràssanu 'a vozza e puru u' ciancu.

Sàrvanu i sordi 'nt'a u' matarazzu,

tènunu 'i spicci' dintra u' pettu,

mentri u' munnu diventa un po' pazzu

'un vàrdanu a nuddu senza rispettu.

Càncianu i tempi, si fannu chiù brutti, 

cumènzanu 'i scarpi  a' ghiri chiù stritti,

u' tempu passa puru pi' tutti: 

i sordi 'un servi tinìrisìlli fitti.

Tutta 'na vita cu' 'dda malatìa

d'arricampàri sordi su sordi:

'un ci ristàu nemmàncu 'a putìa

pi' curpa du' munnu e di' so' stissi 'mbrogghi.

Da: Grafemi e Fonemi

Di: Antonio Famularo

famularoantonio@yahoo.it

tel. 338 1899790 .