Cchiù vecchiu mi fazzu – cchiù forti addiventu !
di Franco Gitto 

Me Nonnu, anticu Omu di valuri,
vantava di na gran filusufìa;
era un Omu d'onuri,
ma, scialava, cantava e divirtìa.

Era Scarparu e granni pinsaturi;
ogni parola era na macchetta.
Essennu di lu munnu sapituri,
un jornu dissi a me Nonna' Francisca:

Non'è chi è u me ciriveddu ca mi frisca...
ma piddaveru sugnu miraculatu !
Non haiu cchiù ansia, o scantu di la morti,
mi sentu comu quannu era surdatu:
e comu allura, oj mi sentu forti !

Non è un prisintimentu:
cchiù vecchiu sugnu e cchiù forti addiventu.
Stu cosu... c'aiu 'mmenzu di li jammi...
quann'era picciutteddu
a piegarilu non ci a fici mai
mancu a pigghiarilu a corpa di marteddu.

Varda, varda Francisca; addivintai un Liuni!
Quantu è strana la vita !:
non l'agghicaunu mancu tri pirsuni
e ora l'agghicu cu sulu 'ddu dita !