Cumpagni di viaggiu di Ignazio Butitta

Cumpagni di viaggiu ! di Ignazio Buttitta

Sta sira li cimi di l'arburi
chi mòvinu la testa e li vrazza
parranu d'amuri a da terra
e io li sentu !

Sunnu li paroli di sempri
chi vui scurdastivu,
cumpagni di viaggiu
nudi e pilusi,in transitu dintra gaggi di ferru

Unn'è chi ghiti a càdiri
si nuddu v'accumpagna
e la scienza è in guerra contru l'omu?

Cu vi jetta li riti
mentri u marusu munta;
siddu i nostromi da puisia
un tempu piscatura di baleni,
ora piscanu a lenza
nni l'acqua marcia di li paludi ?

Cumpagni di viaggiu,
si pirdistivu u cori pa strata;
turnati nn'arreri, turnati a circàllu
si non siti già orbi.

Si u suttirrastuvu chi morti
'nte campi di battagghia;
jti a svrudicallu
si non feti 'nto sangu.

Si ristò a bruciari 'nte càmmiri a gas;
curriti a cogghiri a cìnniri
e mittitila a cuvàri 'nto pettu.

Lu me straziu è pi vui sta sira,
e li paroli d'amuri
càdinu 'nterra
comu stiddi astutati.

Non vurria chi mai turnassi
na sira, la stissa !