Eventi e Comunicazioni

In memoria di mio zio Domenico Casella, conosciuto come ( Minicu u surdu ) e del suo compagno di lavoro Francesco Natoli , morti tragicamente il 30 - 11 - 1943 -

A morti è orba, a morti 'un vidi nenti ! di Giovanni Giardina

clicca sul triangolo bianco per ascoltare

Oh Minicu, u sa pa strata chi vannu disciènnu ?
Ca u timpuni unni travagghi tu, vasci scidiènnu,
e si 'nsama a Diu ,tutta dda terra si nni scinni
mentri ti truovi i sutta , ci ppizzi i pinni !

Oh Marianna, e tu lassali parlàri ,
Chissa è tutta genti ca 'un'havi chiffàri !
'un'è ca si pigghianu i vugghi e a cuasetta e mani,
ci vannu rumpiennu i scatuli e cristiani .

Sicunnu ti , iò c'avissi a fari ?
Mi staiu dintra e 'un vaiu cchiù a travagghiàri ?
Iò haiu a famigghia e u sa , voli manciàri,
pir mi a muntagna si pò tutta sdurrupàri !!

'Un passò tiempu e si sintù u sbrivigghiu
allucchi arrivàru fora cchiù d'un migghiu,
mancu si ci avissiru statu i tirrimota,
dda terra, 'nta nu svidiri, si mullò a na vota.

'Nta nenti si isò un gran purvirùni
ca 'un si visti cchiù mancu u vaddùni
e a chiddi ca si nn'accurgieru di luntànu
ci parsi ca s'avìa rapùtu a vucca d'un vurcànu .

Ddi quattru ca si l'avianu canziàtu
si missiru a fari vusci cumu 'o mircàtu :
Prestu curriti cca, 'un vi fermàti
ca Sarvaturi e Minicu ristàru vurricàti

Purtàti, i zappùna, i pali e i marrabbedda
scircàmu di sarvàrici la pedda
si nn'aiutàmu e nni damu i fari...
forsi fascimu 'ntiempu pi sarvàri !

Mentri a tragedia si ìa cunsumannu
a nutizia pi 'nto paisi ia giriannu
prima 'nformàru i carrabbinieri
e dopu i parenti, i figghi ed i mugghieri.

Quannu arrivàru tuttu 'avìa finùtu
e i salmi già l'avìanu scinnùtu
supa a du tavuli unciùti cu na lapazza
e poi a manu, sulu 'mputiri e vrazza.

Mugghieri e figghi, affranti di dulùri ,
chianciènnu inchièru tutti i mmuccatùri
poi, vuggiùti 'ncielu e cu cori e mani, dissiru :
" Viditi cumu si mori p'un ticchiu i pani ?

A morti è orba, a morti 'un vidi nenti,
'un vidi si ssu picciuotti o patri i famigghia,
quannu girìa fa ...... a ccu pigghia pigghia ! "