"A Morti di Totani"

di Giovanni Giardina

clicca sul triangolo per ascoltare 

Se i totani sunnu frischi pigghiàti a mari

ascùta a mmi, a casa, ‘un’i lavàri

pigghi na schicciula d’uogghiu e na patedda

e i frii cu tuttu u niuru e i vudedda.

Però prima miettici un cummuogghiu

sinnò ponnu scattiari e zumpa l’uogghiu,

ci duni du vutàti e du guriàti,

e ssu pronti pi essiri manciàti.

S’invesci t’avissi a schifiari di vudedda,

i puliziì e i tagghi a ticchiscedda,

ci mietti du patati, na scipudda e na pumamura,

e i fa cosciri p’ammenu na menz’ura.

Mentri c’aspietti ca si fannu cuotti

du sulu sciavuru fannu svigghiari i muorti

pripara ‘ ntavula na uastedda i pani

e na cannata i vinu i Quattrupani.

Si poi i vùa assaggiàri chi spaghetti

cumu i fascimu cca, t’allicchi i piatti,

pripara cappiri, putrusinu e agghiu tritàtu

e ‘mpasta cu uogghiu e pani rattàtu.

Inchi i cappucci finu a falli scoppiàri

poi calali ‘nto sucu, ma ‘un ti scurdàri,

na testa d’agghia sana, na pampinedda addauru

e mmischi ‘nterra sulu pi lu sciavuru.

Chi t’ha pirdùtu s’ancòra ‘un l’ha assaggiàtu !!

Spesci si ssi finu di palàtu,

si nun mi cridi vienili a pruvàri,

e ‘un passa tiempu ca ti viu aggiràri.