Eventi e Comunicazioni

di Antonio Famularo

Iò m'arricordu chi parìa un Castieddu

arrampicatu supra u' munti,

vi si pusava u' pinzèri cumu 'n aceddu

chi s'abbivìra pressu 'na funti;

'i là supra chiantatu parìa 'mpunenti:

sempri 'n silenziu e 'gnuratu da' genti:

'scutava u' Ventu chi vinìa 'i Livanti,

squatriava 'u Mari finu a Punenti.

Quannu 'scurava e scinnìa 'a Notti

parìa 'nt'o Celu 'n mezzu ali Stiddi,

'u 'lluminava 'a Luna alli voti

mentri attornu cantavanu i 'riddi;

'i supra u' munti vardava luntanu,

oltri i paìsi da' Marfa e a' Puddàra,

mentri attornu criscìanu chianu 

spini 'i ruetta e 'ramigna amara.

Ormai trascuratu e tuttu cascanti

pari depressu e un pò scuraggiatu,

supra u' munti si senti 'ngumbranti

cumu 'nu òspiti 'ndisidiràtu;

senza porti e finestri e senza madùni

'u spugghiàru' 'i tuttu 'i mali pirsuni:

'nt'a 'i so' muri ci su' i signi du' Tempu,

ora addivintàu 'a Casa du' Ventu.

Da: IL SALE DI DIDYME

Di: Antonino Francesco Famularo Valastro

famularoantonio@yahoo.it

tel. 338 1899790