Eventi e Comunicazioni

di Giuseppe Lodato©

'Na matri è cunsìgghiu è paròla di cunfòrtu,
quannu tutt'attòrnu ti pari stortu.
È dda vuci rintra di tia,
chi ti leva la malincunìa.

'Na matri è manu c'un ti lassa,
cu idda acciàncu tuttu passa.
Si l'ùnicu pinsèri c'havi 'nta la testa,
si tutti s'alluntànanu sulu idda resta.

'Na matri si leva di 'mmucca lu manciàri,
senza d'idda com' avìssimu a fari.
Tutti cosi lu sò amùri pirdùna,
cummògghia tuttu, facènnu finta c'un si n'addùna.

'Na matri è amùri c'un canùsci cunfìni,
starà cu tia finu a la fini.
Quannu ti senti sulu e cunfùsu,
l'amùri di 'na matri addivènta priziùsu.

'Na matri prea sempri lu Signùri,
ti duna sustègnu, forza e calùri.
Nun ti tradìsci ne ora e ne mai,
si cacchèrunu ti tocca sunnu uài.

'Na matri è l'ùnicu amùri chi dura in etèrnu,
p'addifènniri a tia issi puru a lu 'nfèrnu.
Arrèsti sempri lu sò piccirìddù,
ti raccumànna sempri d'un pigghiàri friddu.

'Na matri quannu 'ncelu si n'acchiàna,
t'arrèsta vicìnu nun s'alluntàna.
Quannu nun c'è cchiù, senti chiossài la sò prisènza,
picchì nuddu pò jìnchiri la sò assènza.